الى اخي الحيطيست

الى اخي الحيطيست

يلي تقول انا حيطيست
تقصد حيط ولا انحطاط
فى كل زنقة تلقى سوسيست
لا احترام ولا انضباط
وزيد تعاكسوا فى البنات
وانتوما املنا الوحيد
انتم راكم فينا النخبة
امس بركة كنتوا طلبة
تخرجتوا وعشتوا فى غربة
وضاع املنا شهيد
لقراية ماتنتهيش كى تصور خويا شهادة
والعلوم والتقنيات ديما راهى فى زيادة
ولى راهو مايسعيش عمروا ما يحقق افادة
يلزم تفيد وتستفيد
قال شنوة فى بطالة
والبلاد حالتها حالة
وعايشين فى جهالة
ماتحكيش على الثقافة
وانتى مش عامل اضافة
يلزم تشارك اكيد
ترقد حتى للعشية
رافض الخدمة العسكرية
تحب تقيد فى جمعية
راس الشهر يصبو الشهرية
هذا كل ما تريد
باش انحلو مشاكلكم الى هى مشاكلنا
يلزم شوية جدية و يلزم شوية تفكير
يزينا من تواكلنا
ونبقى للتمنى اسير
نحاولوا نبنوا مستقبلنا
نخمم فى روحى والغير
نصلح روحى شوية شوية
ونراجع الخطوات
نسطر المستقبل بيدى يزينا مالتفاهات
والوقت الى نضيع فيه يلزم نعملوا حسابات
نخمم فى وطنى الكبير يلزموبرشة مجهودات